開素食自助餐廳 攻年輕人市場

開素食自助餐廳 攻年輕人市場

食齋,似是老一輩才會做的事?其實吃素早有年輕化的趨勢,然而,坊間的素食店少之又少,更以傳統齋菜鋪為主,未必適合年輕人的口味。今年28歲的阿邦(楊應邦)自13年起,在素食工場工作,並開始加入素食行列,他有感平時覓食的不便,便與友人一起開素食餐廳無肉食。餐廳以自助餐形式經營,提供新式又多款的素食,希望給素食者有更多選擇,令更多人體會素食物的滋味。

05102018BA1

阿邦指現時素食自助餐提供超過50款食物,「選擇多啲,客人會食得開心啲。我哋不斷推出新款式及試用新食材,希望可以保持新鮮感。」

正所謂「有得揀,先至係老闆」,素食餐廳無肉食有4位老闆,老闆之一的阿邦深明這個道理,「以自助餐方式經營,係想畀客人有好多選擇,喺揀嘅過程都會開心啲。」記者試食素食自助餐,發現有不少新穎素菜,口感也不像傳統齋菜般油膩,阿邦表示:「呢個係新出嘅意大利青醬焗番茄,好受客人歡迎!想試啱啱出爐嘅芝士撻就要快手,好快會清晒;另外,冇用蛋及奶整嘅純素蛋糕,好多客人都好鍾意。」

05102018BA2

採訪當日,正當5:30pm晚市時段,預約的客人便陸續到來。

無肉食共設有3間分店,分別位於北角、佐敦及旺角新鋪,現時午市收費每位$68、晚市每位$108及週未每位$128。阿邦說:「北角店會多啲上咗年紀嘅客人,約40歲以上;佐敦及旺角店就以年輕人為主,甜品就最受歡迎!」

05102018BA3

自助餐桌設有不同種類的食物,圖為小食類,有炸豆腐、脆麻花、腐皮卷及春卷等。

當大家的印象都以為素食總是要吃綠色的青菜,阿邦卻介紹了不同種類的素食甜品,「好似番薯拔絲及純素燕麥曲奇,都係大熱嘅款式。」店中同時設有冷盤如凉拌秋葵、藜麥沙律,及熱盤如乾炒河粉和欖菜翠玉瓜等,暫時晚市提供超過約50款菜式,選擇不亞於酒店的自助餐。

05102018BA4

甜品中以純素蛋糕最受歡迎,阿邦說:「因為有啲素食人士唔食蛋及奶,而我哋製作嘅純素蛋糕係冇用蛋及奶,味道都唔錯。」

阿邦創業的念頭,源自於生活上的不便。他自11年預科畢業後,輾轉當過幾份政府文職,至13年經朋友介紹下,他到素食工場工作,主要做食品製作及包裝,更受環境的氛圍影響,令他開始吃素,「覺得素雞、素鴨及芋頭魚都幾好食,初初淨係食午餐,慢慢身體腸胃及精神都好咗,所以就試吓全素。」

05102018BA5

阿邦指曾到台灣齋菜鋪試食,當地人會用珊瑚草作食材,「覺得口味好得意,幾彈牙,於是喺台灣入貨。」

轉食齋想創業

自轉為全素後,不便就接踵而來,阿邦說:「喺街搵素食餐廳好難,同埋款式少;同一大班朋友食飯,又好難叫人一齊去普通齋菜鋪,於是就諗不如同朋友一齊開一間迎合到年輕人口味,又多選擇嘅素食餐廳,自助餐形式係我嘅首選。」

05102018BA6

阿邦很多事都會親力親為,「我以前做過廚房又做過樓面,所以對每個崗位都有經驗,喺員工要做其他工作時,我都可以隨時頂上,唔會影響運作。」

14年,阿邦再到素食餐廳工作吸收樓面經驗,當過不同的崗位,自問能應付前線及後勤的工作後,他便於15年開始籌備開店事宜。但第一步找鋪位已令他十分苦惱,「一開始朋友介紹我上深圳睇鋪,但租金貴過香港,仲要畀成百萬嘅頂手費,好快就打消去深圳開業嘅念頭。然後喺香港用咗半年時間搵鋪,睇過灣仔、銅鑼灣及天后,一係太貴,一係業主覺得我哋玩玩吓做唔住,唔肯租畀我哋。」

05102018BA7

阿邦推介這款最近新推出的意大利青醬番茄,味道帶點鹹,配上番茄的清新,有開胃作用。

正當氣餒之際,阿邦卻在北角找到一個2,000呎合適的鋪位,業主也很支持素食的生意。阿邦表示:「以往喺港島區工作,以我觀察所得,港島區嘅人比較肯花錢去嘗試健康飲食,所以想喺呢區先試水溫。」

05102018BA8

剛出爐的芝士撻很快便被搶一空,可見其受歡迎的程度。芝士撻的奶味濃郁,作為甜品,小小的一口分量,十分適中。

做老闆不同打工

阿邦表示本以為自己有樓面及廚房的經驗,營運起來會得心應手,「原來唔係㗎!當乜都關自己事時,實際做起上嚟真係好難!請人、搵食材、租鋪、申請牌照及裝修,事無大小都要處理。我仲試過因為冷氣裝咗喺公共地方而收律師信,差啲搞到上法庭,之後用咗10萬去搬冷氣,呢個教訓令我以後記住,即使幾辛苦都好,要睇清楚所有條文,現實係唔會有人情畀自己,以後要謹慎啲。」

05102018BA9

採訪期間,阿邦接了幾通電話,原來除了要安排工作人手外,更要為貨存作準備,要與送貨公司夾好時間送貨,才能確保食材充足。

在菜式方面,每一至兩星期便會有新菜式,阿邦與同事到不同國家試菜,參考他們所用的食材,「有次去台灣,佢哋有款菜式用到珊瑚草,有啲似海蜇,口感幾得意,現時我哋都有喺台灣入珊瑚草,製作冷盤。」

05102018BA10

新鮮出爐的番薯拔絲十分壯觀,引來不少客人拍照。

此外,阿邦遇到反應不好的菜式,便會停售。「好似用油炸鬼切完再炸,然後加糖膠,結果都係太油,味道唔特別,每次出爐後都冇人夾,喺放咗兩個星期後就冇賣。」他指都有受歡迎的新嘗試,「用菇及雜菜製作嘅腐皮卷及春卷,反應都唔錯。」

05102018BA11

旺角及佐敦店的年輕客人比較多,故餐廳會供應較多款式的甜品,阿邦說:「呢款係純素燕麥曲奇,比較健康。」

定時搞綽頭優惠

阿邦現主要以網站、faceboook、傳媒報導及人傳人的口碑作宣傳,「我仲會喺素食群組分享,同埋大時大節推出新綽頭,好似北角店開張做每位$38、上年新年推出盤菜、冬天有素火煱,今年新年就推出咗薑汁黑糖馬蹄糕、年糕、蘿蔔糕及山渣糕等素糕。」

05102018BA12

客人廖小姐說:「我同朋友第一次嚟,選擇都幾多,純素蛋糕幾得意,好好味。一次過可以試好多素食,感覺唔錯。」

自15年開設北角店後,因反應比預期中好,令阿邦有開設分店的念頭,「北角店位置比較偏僻,原本諗住以年輕客人為主,但竟然吸引到一班年長嘅客人。我希望可以攻埋年輕人市場,所以分店打算開喺年輕人較多嘅聚齊地,17年喺佐敦開分店,然後上個月喺旺角再開多間,年輕捧場客明顯多咗,希望日後可以做到各區都有分店。」

05102018BA13

客人Doris說:「我唔係素食者,但見到介紹素食自助餐都有興趣嚟試,我覺得欖菜翠玉瓜幾好食,清清地又幾有口感,同埋我幾鍾意個芝士撻,味道幾濃。」

參考來源:ecjobs青雲路