台灣生意勁 返內地開業無望

「添好運點心專門店」貴為米芝蓮星級食肆，捧場客自然多，「培哥」麥桂培透露，現時香港5間分店，每月營業額約1,100萬元，即一年有逾1.3億元生意。各類食物中，以20元一碟的叉燒包最好賣，平均日銷300碟，即每日賣1,800個。而香港的分店中，以中環店營業額最高，較其他店高一成以上。

不過，要數到最好生意，卻非香港，而是台灣。添好運在2014年進軍台灣市場，目前已有7間分店，「台灣每間店，每月營業額都不少於700萬台幣（即逾170萬元港幣）」。以此推算，生意額每月逾1,200萬元，整體高過香港一成。反而印尼、馬來西亞兩地反應都一般，「飲食習慣唔同，當地好多人唔食豬肉」。 至於內地市場，添好運短期內都無法進軍，「個商標喺2012年已經喺大陸被人註冊咗，我哋09年開、到12年先畀人註冊，已經算係慢」。雖然之後有與搶先註冊的人洽購商標，「但佢哋目標唔係我哋，出幾錢都絕對唔會賣畀我哋」。言下之意，即只肯賣給「山寨」繼續混水摸魚。 今年添好運最少會在美國夏威夷及洛杉磯開多兩間分店，之後有意在荷蘭及英國開拓歐洲市場，認為當地飲食文化適合中餐發展。